Kota Pekalongan Kuwi Opo Denese

Pekalongan

Pekalongan kwi daerah nang Pulau Jawa, Nggone nang pinggir laut. Pekalongan kui nek nang administrasi Pemerintahan ono 2, Kota Pekalongan karo Kabupaten Pekalongan. Disempitke dadi Pekalongan Kota bae ho, Nek karo Kabupaten kakehen. Dianggep bae Kalongan yo sak kota karo kabupaten sisan wes, Men brayan. Beberapa paragrap pancen nyonto wikipedia, tapi tak usahake bahasan liyane tak garap dewe.

Kota Pekalongan kui diliwati Jalur Pantura utowo Jalan Daendels sing seko Anyer tekan Petarukan.. eh Penarukan maksude. Kota Pekalongan kwi salah sijine pusat pertumbuhan ekonomi nang Jawa Tengah. Batese sing lor, Laut Jawa / Teluk Pekalongan, Sing wetan Mbatang nek sing kidul Kabupaten Pekalongan. Nek kulon temune Kabupaten Pekalongan. Lha nek Kabupaten Pekalongan, Batese lor ono Kota Pekalongane sak liyane Laut Jawa, Sing kulon kwi batese Ngambo eh Pemalang ding, Sing kidul jejeran karo Kabupaten Mbanjarnegara.

Sing marai Pekalongan terkenal e nemen tekan ngendi-ngendi kui yo komoditi sing arane Batik Pekalongan. Pekalongan juga terkenal daerah sing ngasilke iwak laut akeh. Pekalongan jugak diarani Kota Santri, asale akeh pondok pesantren karo Kyai / Habib sing kondang.

 

kota pekalongan

Sejarah Kota Pekalongan Moderen

Asal-usule aran Pekalongan asline ora pati jelas, Nono prasasti opo dokumen liyone sing iso dipertanggungjawabke, mung jare-jare wong tuwo, utowo crito turun temurun. Dokumen sing paling tuo sing nyebut jeneng Kalongan kui muk Gouvernements Besluit Nomer 40 taun 1931. Aran Pekalongan kui asale dek kata Halong sing artine kiro-kiro “entuk hasil lumayan akeh”. Akhire dijenengi Pekalongan. Ono juga sing ngomong nek Pekalongan kui seko kata Kalong. Crito iki dek sejarah Bupati Kwijan Topo Ngalong nggugah Ki Bahurekso. Mbuh kabeh, Asale ono pirang versi tentang Ki Bahurekso. Kapan-kapan tak update.

Tapi intine Londo wes ngerteni karo nyebut Pekalongan awit taun 1900-an. Londo nerbitke Staatbland Nomer 329 taun 1903 sing dadi dhasar legal nggo menehi hak otonomi kanggo saben residensi karo Kota Pekalongan. Hak otonomi iki diatur nang Staatblaad Nomer 124 taun 1906 tanggal 1 April 1906 ngenani Decentralisatie Afzondering van Gelmiddelen voor de Hoofplaatss Pekalongan uit de Algemenee Geldmiddelen de dier Plaatse.  Artine kui Pekalongan dadi wilayah Karesidenan sing dipimpin Residen sing nguwasai administrasi Pemerintahan seko Brebes, Tegal, Pemalang tekan Mbatang. Tanggal 8 Maret 1942, Londo kalah karo Jepang. Jepang ngilangi eksistensi Karesidenan, Mangklihe pemerintahane garek kabupaten karo kotamadya tok nang tiap wilayah.

Perkembangan sak teruse mangklihe diresmike karo keputusan DPRD Kota Pekalongan tanggal 29 Januari 1957 karo tambahan Warta Daerah Tingkat I Jawa Tengah tanggal 15 Desember 1958, Juga karo persetujuan Wilayah Pepekupeda 4 karo SK Nomer SK KTPS-PPD / 00351 / II / 1958 sing nyebutke aran Pekalongan kui dek tembung ‘A-Pek-Halong-An’ sing artine Penghasilan.

Pekalongan Sakbare Kemerdekaan.

Wong Pekalongan juga melu-melu perang kemerdekaan. Salah sijine perang karo Jepang. Wong Kalongan iso ngrebut markas tentara Jepang tanggal 3 Oktober 1945. Perjuangan kui berhasil, tanggal 7 Oktober 1945 Pekalongan bebas dek tentara Jepang. Delok bae nang Monumen kae tanggale bener pora.

Istilah yuridis resmi, Kota Pekalongan digawe nganggo dasar UU Nomer 16 taun 1950 tanggal 14 Agustus 1950 tentang Pembentukan Wilayah Kota Besar nang Jawa Barat, Jawa Tengah, Jawa Timur karo Daerah Istimewa Yogyakarta. Pemerintah yo nerbitke UU Nomer 18 taun 1965 tentang Prinsip Pemerintah Daerah, Pekalongan diganti arane dedi Kotamadya Dati II Pekalongan.

Penerbitan Peraturan Pemerintah Nomer 21 taun 1988 tanggal 5 Desember 1988 karo Instruksi Menteri Dalam Negeri Nomer 3 taun 1989 ngganti bates Kotamadya Dati II Pekalongan, akhire wilayah Pekalongan tambah dek 1.755 hektar dadi 4,465,24 hektar. Kotane dibagi ono 4 kecamatan, 22 desa karo 24 kelurahan. PP Nomer 22 taun 1999 tentang Pemerintahan Daerah dan Peraturan Pemerintah Nomer 32 taun 2004, ngganti jeneng maneh dek Kotamadya Dati II Pekalongan dadi Kota Pekalongan tekan saiki.

Panggonan karo Ciri khas e Pekalongan

Kota Pekalongan kui nggone secara geografis nang 6º50’42 “- 6º55’44” LS mbek 109º37’55 “- 109º42’19” Bujur Timur. Kota Pekalongan kui nggone roto, ora ono area lereng gunung opo legok’an jeru. Onone dataran rendah lemah garing 67, 48% Hektar karo 32,53% sawah (mbuh nek saiki wes do dadi perumahan cok e). Pekalongan kenopo sering benjir utowo Rob, soale datarane rendah tur ngalami Tanah Medun (land subsidence) karo Banyu Laut Munggah (sea level rise).

pekalongan
Rob Pekalongan (Antaranews.co.id)

Laute Kalongan kui landai, ora terjal koyo pantai nang daerah Jogja. Pasire ireng, banyune rodo buthek ora bening. Tur goro-goro endapan sing metu dek kali, Laute dangkal ora patio jeru. Asline tah pantai sing landai kui penak dinggo dolanan, ora bahaya. Mugo-mugo rencana pembangunan wisata pantai nang Pekalongan iso terlaksana sak cepete.

Kota Pekalongan kui hawane rodo panas tur pancen akeh lemute. Nek soal akeh lemute, Yo goro-gorone kui mau, lokasine datar malah kadang duwur laute, dadine banyu buangan ora iso mili, Mangkle banyune buangan do ngecembeng do nggo sarang lemut. Lha nek sing marai panas kui asale nggone pinggir laut / pesisir, Ademe nek ono angin tok. Yo wong sing kuat karo tahan panas tok sing iso urip nang Pekalongan, Nek kowe kepanasen sitik trus meleleh, Ora hiso urip nang kene.

Kaline cok mongklah-mangklih warnane. Ora maido karang akeh sing do nggawe Batik tapi urung paham AMDAL. Do ngguwaki sisa pewarnaan Batik nang kali. Asline yo rodo ora apik, tapi mugo-mugo kedepane do nggawe instalasi limbah, ben kaline bening maneh. Nek kaline resik nggo jukungan penak.

Tapekno’o, Kalongan kui termasuk kota sehat, Ora ngandel yo wes. Kota ne ndewe kwi tau entuk penghargaan

  • Manggala Karya Bhakti Husada tahun 2004 dalam kategori Penyelenggaraan Kota Sehat tingkat Pengembangan
  • Ksatria Bhakti Husada Arutala dalam kategori Penanggulangan DBD tahun 2004
  • Swasti Saba tahun 2005 sebagai Penyelenggara kota sehat klasifikasi wisata.

Nggili gedi nang Kalongan rodo ndrawasi, Sing liwat isine trek-trek gandeng karo bis gedi, durung maneh campur Becak karo Pit. Rodo umbrus tah pancen, tapi sakploke ono Tol rodo mending berkurang. Opo maneh nggon sekip, Nek pas ono sepur liwat jam wayah sekolah, Macet kabeh sak dawan-dawan. Nek ngko jalur lintas utara wes dadi yo Pekalongan cok tambah lego.

jalurpantura
Jalan raya di Pekalongan. (winnetnews.com)

Kota nang Karesidenan Pekalongan sing nduwe mol gedi yo cuma Kota Pekalongan tok, Liyane paling nduwene pasar tiban. Mbiyek ono SriRatu saiki wes kukut, gantine ono Matahari, Borobudur karo TransMart. Beskop juga ono nang Kalongan, ditambah restoran siap saji sing terkenal yo mending ono ra ketang pirang iji. Nek pak moco nggon-nggon bersejarah nang kalongan, kui di klik bae.

Maneh kye, Wong sekitaran Pekalongan sing pak lungo aring Jakarta opo Suroboyo numpak sepur bisnis opo eksekutif yo kudu aring Tapsiyun Pekalongan. Lha asale kreto-kreto eksekutip kui ora mandeg nang kota-kota sekitaran liyane. Tapsiyun Pekalongan kui kategori gedi, ora cumo nggo langsir tok.

Budaya nang Pekalongan

Pekalongan kui ngangeni karo ngrejekeni tur Panganane enak-enak. Kharime ayu-ayu, rijale kentheng-kentheng cumo rodo ireng. Sing putih-putih yo biasane wong cino utowo pendatang. Ngkalongan kui ono telu suku sing mayoritas, yo kui Jowo, Arab karo Cino (Tionghoa). Telung suku kui wes kawet mbiyen rukun ora tau gebrek, Nek nganti gebrek biasane kegowo isu nasional.

Contoh kongkret kerukunan 3 suku kui deloken nang dewan penguruse Kospin Jasa karo bahasa sing dinggo sehari-hari nang Pekalongan. Nek ono jah gelut tah biasa normal, tapi ora nganti ono sentimen anti ras tertentu. Nang Kalongan juga ono wong Bugis, Meduro, Sundo, Batak, India macem-macem lah pokoke.

Mbiyek kerep ono Sintren, Pertunjukan khas Pekalongan sing rodo mistis. Aksine kwi nganggo bocah wedok prawan, ditaleni dileboke kurungan, bar kui terus jopa japu montro karo nari-nari ngundang tenogo gaib. Ngko mbarang wes “dadi”, kurungane dibukak, cah wedoke kui mau wes ucul kabeh talenane trus nari-nari. Kadang wedoke kui cok dinggoni kocomoto ireng. Nek jarene kui kekuatane seko Nyai Lanjar, Penguasane laut utara sing izik seduluran karo Ratu Kidul. “Sulasih, Sulanjono…” biasane ngono tembangane, Jarene kui nggo ngeling-ngeling kisah cintane Raden Sulanjono karo Sulasih sing direwangi Nyai Lanjar.  Wes ah medheni.

Pekalongan olahragane juga mending apik. Nduwe klub dewe jenenge Persip tur yo juga nduwe stadion dewe arane Stadion Hugeng. Reti Pak Hugeng ora? Kebangeten kowe nek ra reti. Selain pak Hugeng, akeh juga wong kalongan sing terkenal koyo : Sugeng Saryadi, HR. Dharsono, Nono Anwar Makarim, Sutrisno Bachir (Politisi), Habib Luthfi , George Junus Aditjondro (Ilmuwan), Arsul Sani (Legislatif), Abdul Hakim Garuda Nusantara (Lawyer), Rudy Hadisuwarno, Syubah Asa (Seniman), Adi Sasono, Abdul Rahman Saleh (Jaksa Agung), Soepeno (Menteri Kabinet Hatta) dll.

Ekonomine Kota Pekalongan.

Pekalongan kui melu daerah sing lumayan apik ekonomine. Daya beline lumayan duwur dibanding kota-kota liyane nang Jawa Tengah. Nggone tah jane ora patio strategis koyo misale Solo sing diubengi daerah penyangga, tapi Pekalongan mayan mending rame. Nang Pekalongan akeh usaha nggawe Batik, Kadek sing cilik nang njero kampung nganti sing pabrikan nang pinggir nggili. Batik Pekalongan kui dudu batik ecek-ecek, Meskipun sing murah yo ono. Nganti UNESCO kui meloke Pekalongan sebagai Kota Kreatif Dunia, Opo ra Sakpore!

worlds city of batik

Wong kalongan ora cumo biso nggawe Batik tok, tapi Kalongan kui juga sentra industri garment koyo misale Pakaian jadi, Busana muslim, Sarung, Aksesoris, Bahan pendukung garmen karo liya-liyane. Nang jero-jero kampung akeh sing do njaiti urusan garmen. Kalongan juga nduwe Pabrik Teh, Limun, Kecap, Pengolahan Iwak Laut tur nduwe pelabuhan perikanan sing lumayan gedi. Pelabuhan kui dadi area transit karo lelang iwak tangkapan nelayan dek ngendi-ngendi, Tapi jare saiki rodo sepi, mbuh nangopo.

Meskipun Ekonomine apik, Pekalongan kui ora nduwe pendapatan daerah sing gedi. Paling dek setoran lokalan tok, Kalongan ora nduwe pabrik-pabrik manufaktur sing gedi koyo sing saiki akeh digawe nang Mbatang.

Panganane Wong Pekalongan

Bahasan iki ora ono nang wikipedia, tapi dibahas nang kene, soale penting nemen. Pekalongan kui terkenal akeh panganan sing enak-enak tur khas, Nang daerah liyo urung mesti ono. Kadung ono rasane bedo tur wagu. Misale :

Makanan Berat

  • Soto Tauto
  • Sego Megono
  • Sego Sotong (Ireng)
  • Kepiting Gemes
  • Sego Toel
  • Garangasem
  • Kroco
  • Pindang Tetel
  • Pecak Panggang
  • Mie Kenyol
  • Nasi Berkat
  • Nasi Kebuli
  • Nasi Uwet
  • Bakso Lontong
  • Sayur Asem Pedoyo
  • Lontong Lemprak

 

Makanan Ringan / Jajanan

  • Awug-awug
  • Kolok Gedang Kele
  • Miusek Sambel
  • Blendung Watung
  • Gemblong Cothot
  • Growol
  • Opak Angin
  • Apem

Urusan Badogan dibahas nang halaman khusus badogan Kalongan. Ojo nang kene, Ora ilok. Di-klik bae kui jenis panganane nek ono link e.

Pendidikan nang Kota Pekalongan

Pekalongan kui pendidikane maju. Keno ngandel keno ora, tapi nyatane akeh wong Kabupaten Pekalongan, Mbatang, Pemalang sing do sekolah nang Kota Pekalongan. Dilampu ngepit opo ngebis dek adoh puo tetep do niat ndaptar sekolah nang Kalongan, padahal nang asale yo ono sekolahan juga. Akeh sekolahan sing dianggep favorit nang Kalongan, Misale :

Kui mbiyek, Saiki kayane wes tambah meneh sing favorit. Tur nek jareku kabeh favorit soale wes usume Zonasi sekolah. Kota Pekalongan juga nduwe Akademi, Sekolah Tinggi karo Universitas. Mangkane, Kowe-kowe jah Mbatang, Pemalang, Kabupaten Pekalongan sing tau sekolah nang kene, Nek nganti ora ngrewangi kemajuan Kota Pekalongan, Kuwalat kowe ngko bakale mbesuk. Kowe kudu ngelingi mbiyek sekolah nang Kalongan.

Akses ring Pekalongan

Sakjane Pekalongan kui gampang di tekani. Numpak Bis yo akeh, Numpak sepur dek sing ekonomi nganti sing eksekutif mandeg kabeh nang Tapsiyun. Saiki juga ono Tol sing iso diakses dek pintu tol Setono opo sing Mbojong. Memang tah, Kalongan rung nduwe Bandara. Sopo reti mbesuk nang Pragak opo nang Pasir Sari digawe Bandara. Tapi nek misale pak nekat medun dek pesawat pas liwat Kalongan yo ra kaiki tah.

tol-pekalongan
Pintu Tol Pekalongan. (marchelloka.com)

Angkutan Travel sing maring Kalongan juga akeh nemen. Pak dek Jogja, Semarang, Solo, Purwokerto, Mbendung, opo maneh Jakarta mesti ono. Ora usah kuatir. Taksi biasa opo taksi onlen yo wes ono, Mbok misale kowe pak aring Peninggaran mbengi-mbengi be tetep iso.

Penutup

Izik akeh sing apak dicritake tentang Kalongan, tapi aku yakin kowe paling sungkan moco. Nggo penutup, Nek semisal kowe nduwe sumber daya mbuh kui opo bae, Rewangi sitik-sitik nggo kemajuan Kota Pekalongan, Sukur-sukur akeh. Opo meneh gelem bali nang Kalongan melu mbangun nggo kemajuan kota Pekalongan. Wes ho Nda, Kemeng tangane.